ᐃᖃᐃᓕᓴᕐᓂᖅ ᐱᒻᒪᕆᐅᕗᖅ ᖃᓄᐃᖏᑦᑎᐊᕐᓂᕐᒧᑦ. ᐃᖃᐃᓕᓴᕐᓂᖅ ᓄᓇᓕᐅᖃᑎᒌᑦ ᐅᓪᓚᑦᑐᑦ ᐊᔅᓱᕈᓗᐊᕈᓐᓃᕈᑕᐅᓲᖅ, ᐃᓱᒪᑦᑎᐊᕆᒃᑲᓐᓂᔾᔪᑎᐅᓪᓗᓂ, ᐃᓅᖃᑎᒌᒍᑕᐅᓪᓗᓂᓗ. ᑕᐃᒫᒃ ᐱᔾᔪᑎᖃᓚᐅᖅᑐᖅ “ᐃᖃᓗᐃᑦ ᓇᓪᓕᓐᓂᖓ ᐊᑕᐅᓯᖃᑎᒌᓪᓗ ᐅᓪᓚᓐᓂᖅ,” ᓄᓇᓕᒃ ᐅᓪᓚᓐᓂᖃᓚᐅᖅᑐᑦ ᐋᖅᑭᔅᓱᖅᑕᐅᓪᓗᓂ ᐃᖃᓗᓐᓂ, ᓄᓇᕗᒻᒥ. ᐋᖅᑭᔅᓱᖅᑕᐅᓚᐅᖅᑐᖅ ᐃᓅᓯᕐᒨᖓᓪᓚᕆᑦᑐᓄᑦ ᖃᐅᔨᓴᕐᕕᒃᑯᓐᓄᑦ, ᐃᖃᓗᐃᑦ ᓄᓇᓕᐸᐅᔭᒃᑯᖏᑦ ᐊᒻᒪᓗ ᓄᓇᕗᒻᒥ ᐃᓪᓖᑦ ᐊᑐᖃᑦᑕᖅᓯᒪᔭᖏᑦ ᑲᑐᔾᔨᖃᑎᒌᖏᑦ, ᑮᓇᐅᔭᖃᖅᑎᑕᐅᓪᓗᑎ ᐱᙳᐊᖅᑐᓕᕆᔨᒃᑯᑦ ᐱᓕᕆᕝᕕᖓᓐᓂ ᓄᓇᕗᑦ ᒐᕙᒪᒃᑯᖏᓐᓂᑦ, ᑖᓐᓇ ᐅᓪᓚᓐᓂᖅ ᑲᑎᑎᑦᑎᓚᐅᖅᐳᖅ 100-ᓂ ᐃᓚᐅᖃᑕᐅᓪᓗᑎᑦ. ᐱᒋᐊᓚᐅᖅᑐᓂ ᐅᓪᓚᓐᓂᖅ ᖁᕕᐊᓲᑎᖃᖅᑐᑎᑦ ᓴᐱᓕᖅᓴᕋᐃᖏᓐᓂᕐᒥ, ᐃᓚᒋᔭᐅᓂᖅ, ᐊᒻᒪᓗ ᐊᑦᑐᐊᓪᓗᓂ ᐋᓐᓂᐊᖃᕐᓇᖏᑦᑐᒧᑦ, ᓄᓇᒧ, ᐊᒻᒪᓗ ᐱᐅᓯᑐᖃᕐᒧᑦ.
ᐊᒥᓱᑦ ᐃᓚᐅᖃᑕᐅᔪᑦ ᐅᓪᓚᓚᐅᖅᐳᑦ 5 ᑭᓛᒥᑐᒥᑦ, ᖃᑦᑏᓐᓇᐅᓂᖅᓴᓂᑦ ᑲᑎᙵᔪᖃᕆᓪᓗᓂ (ᓱᕈᓰᑦ ᐊᐃᑉᐸᕇᓪᓗ) ᐱᖃᑕᐅᓪᓗᑎ 1 ᑭᓛᒥᑐᒥᑦ. ᑕᒪᓐᓇ ᑕᑯᓐᓇᒐᖃᕐᓂᖅᓴᐅᓚᐅᖅᑐᑦ ᓄᓇᓕᓐᓅᖓᓂᖅᓴᐅᔪᒥᑦ ᓵᓚᖃᕋᓱᙱᓂᖅᓴᐅᓪᓗᑎ. ᓱᓕ, ᓵᓚᖃᐅᓯᐊᖑᓂᐊᖅᑐᑦ ᐊᓕᐊᓇᐃᒍᓲᑎᒃᑲᓐᓂᐅᓚᐅᕐᒥᔪᑦ, ᐱᖃᓯᐅᔾᔭᐅᓪᓗᓂ ᑮᓇᐅᔭᑦ $1000 ᐊᒻᒪᓗ ᐱᔾᔪᓯᐊᖅᑕᖃᖅᑐᓂᓗ ᐅᓪᓚᒃᑲᐅᓚᕐᒧᑦ. ᓵᓚᖃᓚᐅᖅᑐᖅ ᐊᐃᓴᒃ ᕗᕆᑕ, ᐃᓱᒪᒋᔭᕐᒥᓂ ᐅᖃᐅᓯᖃᓚᐅᖅᑐᖅ ᐊᔅᓱᕋᓐᓇᕐᓂᕆᓚᐅᖅᑕᖓᓂ ᐊᓕᐊᓇᓐᓂᖓᓂᓪᓗ:
ᐱᒡᒐᓇᓛᖑᓚᐅᖅᑐᖅ ᐅᓪᓚᓐᓂᖅ ᑕᓯᓗᓕᐊᕆᐊᒃᑯᑦ […] ᐅᓪᓚᑦᑐᓂ ᖁᒻᒧᑦ ᐱᒡᒐᓇᓪᓚᕆᓚᐅᖅᑐᖅ. ᖁᕕᐊᓱᓪᓚᕆᑦᑐᖓ ᐱᔪᓐᓇᖅᑎᑕᐅᒐᒪ, ᐊᒻᒪᓗ ᓵᓚᖃᐅᓯᐊᕋ ᑮᓇᐅᔭᑦ $1000 ᐅᐱᓐᓇᓪᓚᕆᑦᑐᑦ ᑐᓂᓯᑦᑎᐊᕈᓐᓇᕐᒪᑕ.
ᐅᓪᓚᖃᑕᐅᓚᐅᕐᒥᔪᖅ ᑭᒻ, ᒪᐃᔭᐅᑉ ᑐᖏᓕᐊ ᐃᖃᓗᐃᑦ ᓄᓇᓕᐸᐅᔭᒃᑯᖏᓐᓂ, ᕿᒻᒥᖓᓗ ᐱᖃᑕᐅᓪᓗᓂ. ᐊᑯᓂ ᑭᒡᒐᖅᑐᐃᔨᐅᓕᖅᑐᖅ ᓄᓇᓕᓐᓄᑦ ᖃᓄᐃᙱᑦᑎᐊᕐᓂᒨᖓᔪᓂ ᓄᓇᓕᒻᒥᓪᓗ ᖃᓄᐃᓕᐅᕈᓘᔭᖅᑐᖃᑦᑎᓪᓗ. ᑭᒻ ᐱᖃᑕᐅᔪᒪᑦᑎᐊᓚᐅᖅᐳᖅ ᑕᑯᔅᓴᐅᑎᑦᑎᓗᓂᓗ ᐃᑲᔪᖅᓱᓂᕐᒥᓂᒃ ᐋᓐᓂᐊᖃᖏᓐᓂᕐᒨᖓᔪᓂᑦ ᐊᒻᒪᓗ ᑲᑎᓐᓂᐅᔪᒥ ᐃᖃᓗᓐᓂ. ᑭᒻᐳᓕ ᓯᒥᑦ ᐅᖃᖅᐳᖅ,
ᐱᐅᑦᑎᐊᓚᐅᖅᑐᖅ ᐊᓕᐊᓇᐃᒍᓱᑦᑐᖓᓗ [….] ᓂᕆᐅᑉᐳᖓ ᐅᓪᓚᑦᑐᖃᒃᑲᓐᓂᓕᕐᒥᑉᐸᑦ ᐱᑦᑎᐊᓂᖅᓴᐅᒍᒪᕗᖓ.
ᐃᖃᓗᓐᓂ ᓇᓪᓕᓐᓂᖓ ᐊᑕᐅᓯᖃᑎᒌᓪᓗ ᐅᓪᓚᓐᓂᖅ ᓇᓗᓇᐃᖅᓯᓚᐅᖅᐳᖅ ᐅᓪᓚᓐᓂᑐᐃᓐᓇᐅᖏᑦᑐᒥ ᐅᓪᓗᕐᒥ. ᑕᑯᔅᓴᐅᑎᑦᑎᓚᐅᖅᑐᖅ ᐃᓅᓯᑦᑎᐊᕆᓐᓂᕐᒧᑦ, ᐱᖅᑯᓯᐅᓂᕐᒧᑦ ᑐᑭᓯᐅᒪᓂᕐᒧᑦ, ᐃᓚᐅᑎᑦᑎᓂᖅ, ᑲᑎᓐᓂᐅᔪᖅ ᓴᙵᑦᑎᑦᑎᑲᓐᓂᖅᑐᓂ ᐃᓅᖃᑎᒌᓐᓂᕐᒥᑦ, ᖁᔭᓕᔾᔪᑕᐅᓪᓗᓂᓗ ᐱᖁᓯᕐᒧᑦ, ᐊᖏᖃᑎᒌᓐᓂᕐᒥᑦ ᐋᓐᓂᐊᖃᕐᓇᖏᑦᑐᒧᑦ ᑲᑎᓐᓂᕐᒧᓪᓗ. ᐃᓚᐅᖃᑕᐅᔪᑦ ᐊᓕᐊᓇᐃᒍᓱᓪᓚᕆᓚᐅᖅᑐᑦ ᑕᑯᔭᔅᓴᑦᑎᐊᕙᓐᓂ ᐊᒻᒪᓗ ᐃᓚᒌᓄᑦ ᐱᓕᕆᐊᔅᓴᐅᓪᓗᑎ, ᐅᓪᓗᖅ ᐊᓕᐊᓇᑦᑐᓂ ᑐᑭᖃᑦᑎᐊᖅᑐᓂᓗ.
ᐱᓕᕆᔩᑦ ᐊᑭᓕᖅᓱᖅᑕᐅᒐᑎᒃ ᐊᒻᒪᓗ ᓄᓇᓕᒻᒥ ᑲᑐᔾᔨᖃᑎᒌᖏᑦ ᐊᐅᓚᑦᑎᓪᓚᕆᓚᐅᖅᐳᑦ, ᐱᕕᔅᓴᖏᓐᓂᑦ, ᓱᓇᒃᑯᑖᖏᓐᓂᑦ, ᐊᒻᒪᓗ ᐱᔪᒪᓂᖏᓐᓂ ᖁᕕᐊᓲᑎᖃᖅᑎᓪᓗᒋᑦ ᓄᓇᓕᓐᓄᑦ. ᑎᕆᒃ, ᐱᖓᔪᒋᔭᐅᓚᐅᖅᑐᖅ ᐅᓪᓚᓐᓂᕐᒧᑦ ᑦ ᑭᓛᒥᑐᒥ, ᐃᓱᒪᒋᔭᖃᖅᐳᖅ ᐃᒫᒃ:
ᖁᔭᓐᓇᒦᕈᒪᔪᖓ ᐃᓅᓯᕐᒨᖓᓪᓚᕆᑦᑐᓐᓄᑦ ᖃᐅᔨᓴᕐᕕᔾᔪᐊᕐᒧᑦ ᐋᖅᑭᔅᓱᐃᓚᕐᒪᑕ […] ᐅᓪᓚᓐᓂᖅ ᐱᔭᕆᐊᑭᑦᑑᓚᐅᖏᑦᑐᑦ ᐱᔭᕇᕋᓱᑦᑐᒍ […]. ᐱᖓᔪᒋᔭᐅᓕᖅᑐᖓᓗ ᑭᓯᐊᓂ, ᖃᐅᔨᒪᑦᑎᐊᖅᐳᖓ ᐃᓅᓯᕐᒧᖓᓪᓚᕆᑦᑐᓐᓄ ᖃᐅᔨᓴᕐᕕᔪᐊᒃᑯᑦ ᐋᖅᑭᔅᓱᐃᑲᓐᓂᓛᕐᓂᖏᓐᓂᑦ ᐊᕐᕌᒎᓛᖅᑐᒥ, ᐃᓚᐅᖃᑕᐅᓛᕐᒥᔪᖓ ᐱᑦᑎᐊᓂᖅᓴᐅᓪᓗᖓᓗ.
ᑐᓯᐊᓇ, ᐊᕐᓇᓂ ᓯᕗᓪᓕᖅᐹᖑᓪᓗᓂ ᐱᔭᕇᖅᑐᓂ, ᐃᒪᐃᓕᓪᓗᓂ:
ᑖᓐᓇ ᐱᕕᔅᓴᑦᑎᐊᕙᐅᓚᐅᖅᑐᖅ ᑲᑎᖃᑎᒌᒍᑕᐅᑦᑎᐊᖅᑐᓂᓗ ᐅᓪᓚᓐᓂᐅᔪᒥ. ᖁᒻᒧᑦ ᐅᓪᓚᕐᓂᕐᒧᑦ ᐱᓕᒻᒪᔅᓴᓛᖅᑐᖓ ᐅᓪᓚᑦᑐᖃᓕᕐᒥᐸᑦ ᐱᓕᒻᒪᔅᓴᖅᓯᒪᑦᑎᐊᓛᕋᒪ.
ᐅᓪᓚᓐᓂᑭᓴᐅᑎᓂᕐᒧᑦ ᐋᖅᑭᓱᐃᔩᑦ ᐃᓅᓯᕐᒨᖓᓪᓚᕆᑦᑐᓐᓄᑦ ᖃᐅᔨᓴᕐᕕᔾᔪᐊᕐᒧᑦ ᓂᕆᐅᑦᑎᐊᓪᓚᕆᑉᐳᑦ ᑖᒃᑯᐊ “ᐃᖃᓗᐃᑦ ᓇᓪᓕᓐᓂᖓ ᐊᑕᐅᓯᖃᑎᒌᓪᓗ ᐅᓪᓚᓐᓂᖅ,” ᐊᕐᕌᒍᑕᒫᑦ ᐅᐱᕐᖔᒃᑯᑦ ᐱᓕᕆᐊᕐᒥᑦ. ᐅᓪᓚᒌᖅᓯᒪᓕᖅᑎᓪᓗᒋᑦ ᐊᐱᖅᓱᑕᐅᔪᑦ 98%−ᖑᔪᑦ ᐅᖃᓚᐅᖅᑐᑦ ᐱᖃᑕᐅᒃᑲᓐᓂᕋᔭᕐᓂᖏᓐᓂᑦ ᐅᓪᓚᓪᓗᑎᒃ ᐊᕐᕌᒎᓛᖅᑐᒥ ᐋᖅᑭᔅᓱᖅᑕᐅᓂᐊᖅᐸᑦ.
ᖃᑦᑎᕆᔩᑦ ᐅᐊᑦᑎᔪᑦ ᐅᓪᓚᑦᑐᓂ ᐊᑐᕆᐊᕐᒥ ᐅᓪᓚᑦᑐᑦ ᐊᑦᑕᓇᖅᑐᒦᓂᐊᖏᒻᒪᑕ.
ᑲᔪᓯᑦᑎᐊᕐᓂᖃᓚᐅᖅᑐᓪᓗᒍ, ᐱᓕᕆᔩᑦ ᐱᒡᒐᓇᖅᑐᓂ ᐊᖅᑯᓵᖅᓯᖃᑦᑕᓚᐅᕐᒥᔪᑦ ᐃᖃᓗᓐᓂ ᓯᓚᖓ ᐱᕕᑭᑦᑑᕙᒻᒪ. ᐅᓪᓚᕐᓂᖅ ᐋᒡᒌᓯᒥᐅᓂᐊᓚᐅᖅᑐᖅ ᐅᓪᓗᕆᔭᐅᓂᐊᖅᑐᒥᒃ ᓇᓗᓇᐃᖅᑐᑎᒃ ᕿᒥᕐᕈᓚᐅᖅᑐᑎ ᓯᓚᓐᓂᐊᖅᑐᑎᓪᓗ, ᓯᓚᑦᑎᐊᕙᐅᓂᐊᖅᑎᓪᓗᒍ. ᐱᕕᑭᓐᓂᖓᓄᑦ ᐱᓕᕆᔩᑦ ᐸᕐᓇᒍᓐᓇᕐᓂᖏᓐᓂ, ᓵᓚᖃᐅᓯᐊᖑᓂᐊᖅᑐᖅ ᑎᑭᓚᐅᖅᑐᑦ ᑭᓯᐊᓂ ᐃᖅᑲᓇᐃᔭᕐᓇᐅᒃᑲᓐᓂᓕᖅᑎᓪᓗᒍ, ᐅᓪᓚᓐᓂᖅ ᐱᓇᓱᐊᕈᓯᐅᑉ ᓄᙳᐊᓃᓚᐅᕐᒪᑦ. ᐊᒻᒪ ᓱᓕ, ᖃᓕᐹᑦ ᓇᓴᓖᑦ ᐊᑭᖃᖏᑦᑐᑦ ᓄᖑᑕᐅᓚᐅᖅᑐᑦ ᐊᒥᓲᓚᐅᕐᒪᑕ ᐃᓚᐅᔪᑦ ᑕᐃᒫᓪᓗ ᓂᕆᐅᓚᐅᖏᒻᒪᑕ. ᐅᖃᖅᑐᓂ ᓘᑦᑖᖅ ᑯᕆᔅ ᐱᒌᓚᐅᐊ, ᐊᖏᔪᖅᑳᕆᔭᐅᔪᖅ ᐅᓪᓚᑦᑐᑦ ᐱᓕᕆᔨᖏᑦ ᑕᐃᑲᓂ ᐃᓅᓯᕐᒨᖓᓪᓚᕆᑦᑐᓐᓄᑦ ᖃᐅᔨᓴᕐᕕᔾᔪᐊᕐᒧᑦ, ᐃᓕᓐᓂᐊᕈᑎᐅᒻᒥᔪᑦ ᖃᐅᔨᒪᓂᐊᓕᖅᑐᑎᓪᓗ ᐱᐅᓯᕚᓪᓕᕈᓐᓇᓂᕐᒥᑦ ᐸᕐᓇᑦᑎᓪᓗᒋᑦ ᐃᓚᐅᖃᑕᐅᔪᓪᓗ ᐊᑐᕐᓂᑯᖏᓐᓂ ᐅᓪᓚᓐᓂᐅᑲᓐᓂᓛᖅᑐᒥ.
ᐊᑕᖏᑦᑐᑎᑦ, “ᐃᖃᓗᐃᑦ ᓇᓪᓕᓐᓂᖓ ᐊᑕᐅᓯᖃᑎᒌᓪᓗ ᐅᓪᓚᓐᓂᖅ” ᑕᑯᔅᓴᐅᑎᑦᑎᓚᐅᖅᐳᑦ ᓄᓇᓖᑦ ᓴᙱᔫᓂᖏᓐᓂᑦ, ᐱᖅᑯᓯᖏᓐᓂᑦ, ᐃᓅᓯᖃᑦᑎᐊᓂᕐᒥᑦ ᑲᑎᑦᑎᓪᓗᓂ ᐊᑕᐅᓯᕐᒧᑦ ᐱᓕᕆᐊᖑᔪᒧᑦ. ᐃᓚᐅᖃᑕᐅᔪᓂᑦ ᐃᓚᒌᓪᓗ ᐊᑭᓕᖅᓱᖅᑕᐅᓇᑎ ᐱᓕᕆᔩᑦ ᐊᒻᒪᓗ ᓄᓇᓕᒻᒥ ᑲᑐᔾᔨᖃᑎᒌᓂᑦ, ᑖᓐᓇ ᐅᓪᓚᓐᓂᖅ ᐃᑉᐱᒋᔭᐅᑦᑎᐊᓕᓚᐅᖅᐳᖅ ᑭᒃᑯᓕᒫᓄᑦ ᐃᓚᐅᖃᑕᐅᔪᓄᑦ, ᓴᙱᑦᑎᒋᐊᒃᑲᓐᓂᖅᑐᑎᓪᓗ ᐱᓕᕆᔨᖏᑦ ᐃᓅᓯᕐᒨᖓᓪᓚᕆᑦᑐᓐᓄᑦ ᖃᐅᔨᓴᕐᕕᔾᔪᐊᒃᑯᑦ, ᐃᖃᓗᓐᓂ ᓄᓇᓕᐸᐅᔭᒃᑯᖏᓪᓗ.
ᑎᑎᕋᖅᑐᖅ ᕉᔅᓕᓐ ᕈᕕᒻᐳ, ᖃᐅᔨᓴᖅᑎ